သံယောဇဉ်ကြိုး

တမျှင်ခြင်း ရစ်ပတ်

တရစ်ခြင်း တုပ်နှောင်

ရုန်းထွက်မရအောင်

ခိုင်မြဲတဲ့အရာ

သံယောဇဉ်လွန်းတင်ထိုး

ကြိုးသုံးကြိုး ရစ်ပတ်သမျှ

ကျွန်တော်ရုန်းမထွက်နိုင်တာ

မဆန်းပါဘူးဗျာ။

အမေ့သား



အကြည့်

အကြည့်တချက်

တွယ်ငြိကာသက်ဆင်း

မာယာမပါတဲ့ကျော့ကွင်း

ကျွန်တော်ကိုယ်တိုင်

လည်စင်းပေးခဲ့တာ။

အမေ့သား



နှလုံးသားရဲ့အတွင်းတနေရာ

ဇနီးပါးပြင် တချက်နမ်း
သမီးပါးပြင် တချက်နမ်း
ဤသည်ကာ ‌နေ့စဉ်အမှု

နှေးတုံ့ခြေလှမ်းတို့ဖြင့်
အလုပ်ကိုသွားသော်ငြား
စိတ်အစဉ်သွင်ပြင်သည်
အရိပ်လို တွဲကပ်လျက်
သူတို့အပါးမှာ ခစား

တရစ်ခြင်း ရစ်ပတ်မိတဲ့
သံယောဇဉ်ကြိုးများသည်
ပူလောင်ခြင်းကင်းမဲ့ကာ
မေတ္တာစိတ်များနဲ့ ပြည့်နှက်
ဤသည်ကာ သဘာဝ

သဘာဝပင် ဖြစ်လင့်ကစား
ကိုယ့်အတွက် ထူးခြားဖြစ်စဉ်
စောင့်စားခဲ့ရတဲ့ မျှော်လင့်ချက်
အမြဲမက်ခဲ့ရတဲ့ အိပ်မက်တခုမို့
ဤသည်ကာ
တန်ဖိုးမဖြတ်နိုင်သော
ကျွန်တော်ရဲ့နှလုံးသား
အစိတ်အပိုင်းများတည်။

အမေ့သား

သမီးလေးနဲ့ တနေ့တာ (သို့) ပီတိစားခဲ့ရတဲ့နေ့

လှုပ်ရှားရုန်းကန်သံ သဲ့သဲ့ကြားတော့ မျက်လုံးအစုံနဲ့ ကျင့်သားရနေတဲ့

နားက အလိုလို ဖွင့်လျက်သား။

ကုတင်တဖက်အခြမ်းမှ အပြန်အလှန်ပစ်ခတ်နေသော

အသေးစားတိုက်ပွဲတခု

တဖက်က ဒါလေးကုန်အောင်စို့ပါ သမီးရယ်ဆိုတဲ့ အမေနဲ့ တဖက်ကလည်း ကော့ကန် ထိုးလို့ထိန်းမရအောင် ရုန်းကန်နေတဲ့သမီး။

ထိုတိုက်ပွဲဆိုတာက နေ့စဉ်မြင်တွေ့နေကြ

ဘာမှမထူးဆန်းလှသောမြင်ကွင်း တခု

ဒါပေမဲ့ ထူးဆန်းနေတာက ကျွန်တော်စိတ်

ဒီနေ့က သမီးလေးနဲ့ သားအဖနှစ်ဦးထဲ

အိမ်မှာနေခဲ့ရမဲ့နေ့။

မနေ့ကတည်းက သမီးရဲ့ တနေ့တာကို

သူ့အမေစီက အနီးကပ်လေ့လာသင်ယူ

ထားပြီးသား ညအိပ်တော့လည်း ဘာပြီးရင် ဘာလုပ်ရမယ်ဆိုတာက အိပ်မက်ထဲ

တောင်အစီအရီတခုချင်း ထင်ထင်ရှားရှားမို့

အထူးတလည် မဖြစ်တော့  ဖြေဆိုရမဲ့

ဘာသာအတွက် ပိုင်နိုင်နေသော ကျောင်းသားတယောက်လို ခေါင်းမော့ရင်ကော့ကာ အိပ်ရာကထပေါ့။

မျက်နှာသစ်ပြီးချိန်မှာ သမီးလေးလည်း နို့စို့ပြီးသွားတော့ ပြန်လည်အိပ်ဖို့တာစူနေလေပြီ။သူ့အမေက  စိတ်မချသလို ဘာပြီးရင် ဘာနော် ဘာလုပ်ရမယ်

ကလေးက ဘယ်လို ဘာနဲ့ ဘယ်လို ဘာဖြစ်မယ် ဘာလုပ်ရမယ် ဘာချင်းထပ်ရင် ပေါက်ပေါက်လည်းဖောက် အလုပ်သွားဖို့လည်း ပြင်ဆင်လို့ မနားတမ်းပြောဆို

နေပေမဲ့ ကျွန်တော်ကတော့ တိုက်ပွဲပေါင်း

များစွာတိုက်ခဲ့ပြီးတဲ့ စစ်သူကြီးတယောက်

လို ခေါင်းမော့ရင်ကော့ကာ အေးပါကွာ

စိတ်ချဆင်းပါ အလုပ်ကို သာ

အေးဆေးသွားပါဆိုပြီး တခါးဖွင့် အတင်းတွန်းထုတ်ရင်း သမီးကို

ပုခက်ထဲထည့်လွဲရင်းနဲ့။

ပထမဆုံး ကျွန်တော် ဖုန်းကိုယူပြီး

Alarm set လုပ်လိုက်တယ်

သုံးနာရီခြားတခါမို့ 10:30 /1:30/4:30/7:30 ဆိုပြီး

set လုပ်လိုက်တယ်။ပြီးတာနဲ့ အိပ်ရေးမကျတကျဖြစ်နေတဲ့သမီးကို

အစီအစဉ်မကျသော တေးပေါင်းချုပ်နဲ့

ချော့သိပ်ရင်း မေးခွန်းတွေကို ပြန်လည်

စီစစ်မိတယ်။နိုးလာရင် လုပ်ရမှာက သမီး

ကို ရေချိုးပေးရမယ်။ ပြီးမှ နို့တိုက်ရမယ်

နို့တိုက်ပြီးရင်ဆိုတဲ့ ကျွန်တော့်အဖြေတွေ

က တချက်ချင်းပေါ်လာတော့

အိပ်မောကျသွားတဲ့ သမီးကို လွဲပေးခဲ့ပြီး

အခန်းထဲသွား အနှီးတထည်ယူ ကုတင်

ပေါ်ခင်း  သမီးဗီဒိုထဲက ရေချိုးပြီးဝတ်ဖို့

အကျီၤဘောင်းဘီရွေးထုတ်ပြီး အနှီးဘေး မှာထား   ဟုတ်ပြီ... 

ဘေဘီလိုးရှင်းဗူး၊ဒိုက်ဗာ၊ ဒိုက်ဗာကရင်၊

သမီးရေသုတ်ဖို့မျက်နှာသုတ်ပုဝါတထည်။

ရေချိုးဖို့အတွက်က ရေချိုးကန်ရယ်

ရေချိုးဇလုံရယ်ကို သန့်ဇင်ဆေးကြောပြီး

အဆင့်သင့်ပြင်ထား ရေချိုးကန်နားမှာ

သမီးရေချိုးဆပ်ပြာ ခေါင်းလျှော်ရည်ဗူး

ရေလောင်းဖို့ခွက်ကလေးတလုံးထား

ပြီးတော့ သမီးမျက်နှာသစ်ဖို့ ပုဝါသေး

သေးနုနုလေးတထည်။

ဒါဆို ပြည့်စုံပြီးပေါ့ ဘာလိုသေးလဲ နို့ဗူး

ဖျော်ရမယ် သမီးက နိုးတာနဲ့ ဆာတတ်တယ်  အခုကရေချိုးပြီးမှ တိုက်ရမှာဆိုတော့ ပိုဆိုးမယ်

တခါတည်း ကြိုဖျော်ထားမှရမယ်   

နို့ဗူးပေါင်းထားတဲ့ အထဲက

နို့ဗူးတဗူးယူ ပြီး ရေကျက်အေးရယ်

ရေနွေး လေးရယ်ကို 80ml ထည့်

နို့မှုန့်ကတော့ သူ့အမေ

ပြင်ဆင်ထားပေးပြီးသား လောင်းထည့်လိုက်ရုံ အဆင်သင့်

အရာအားလုံးဟာပြည့်စုံလေပြီ။

နာရီကြည့်လိုက်တော့ ဆယ်နာရီခွဲကာနီးလေပြီ သိပ်မကြာလိုက်

ဖုန်းကနေ alarm မြည်လာလေပြီ

အသာလေး သမီးပုခက်နား သွားကြည့်တော့ မျက်လုံးလေး ပုတ်ခတ်

ပုတ်ခတ်နဲ့ နိုးနေလေပြီ။

သမီးလေးကို ပုခက်ထဲကချီထုတ်ပြီး

ရေလေးနည်းနည်းတိုက်လို့ လန်းဆန်းသွားအောင်ခဏလေး

နေပြီးတော့ ကျွန်တော်တို့သားအဖ

ရေချိုးဖို့စတင်လှုပ်ရှားရပြီပေါ့

ရေချိုးဇလုံထဲ ရေအေးရေနွေးစပ်ပြီး

ရေချိုးကန်ထဲ တဝက်ခွဲပြီး ထည့်ထား

လိုက်တယ်။ သမီးလေးကတော့

သူ့ကုတင်လေးထဲရုန်းကန်နေဆဲပေါ့။

သမီးလေးကို သွားချီလာခဲ့ပြီး

မျက်နှာလေးကို အရင်သစ်ပေးလိုက်တယ်

ငြိမ်သက်နေတဲ့သမီးလေး ကြက်သီးနွေးရေ

ကြောင့် ပိုမိုလှုပ်ရှားလာတယ်။

ကျွန်တော်လည်းသမီးလေး ပိုးတုံးလုံးကိုယ်လေးကို ပွေ့လို့

ရေချိုးကန်လေးထဲ ခြေထောက်လေးက

စပြီး ဖြည်းဖြည်းချင်းထည့်တော့

ရုန်းကန်မှုတွေနဲ့အတူ

တချက်အော်ရင် ရေကို စုံကန်

နေတော့တယ်။ တအောင့်လောက်

ကြာတော့ ငြိမ်သက်ရင်း ရေကြိုက်တဲ့

သမီးက ရေထဲမှာမြူးတူးနေတယ်

သန့်ရှင်းရေးလေး အကုန်လုပ်ပေး

ဆပ်ပြာတိုက်ပြီးရေပြန်လောင်းပေး

သဘက်နုနုလေးနဲ့ ပွတ်ပေးပြီးတော့

ရေချိုးဇလုံးဖက်ကိုပြောင်းရေနွေးလေးနဲ့ နောက်ဆုံးပိတ်ချိုးပေးပြီး

သဘက်ကလေးနဲ့ သမီးကိုပတ်လို့

ကုတင်ကိုပြန်လာ ရေခြောက်အောင်

သုတ်ပေးပြီး တကိုယ်လုံး ဘေဘီလိုးရှင်းလူးပေး  အကျီၤဝင်ပေး

ဒိုက်ဗာကရင်လေး လိမ်းပေး ဒိုက်ဗာပတ်ပေး ဘောင်းဘီလေးဝတ်

ပေးပြီးသွားတာနဲ့ သမီးလေးနွေးထွေး

အောင်ရင်ခွင်ထဲ ခဏထွေးပွေ့ထား

လိုက်တယ်။

သိပ်မကြာလူးလွန့်လာပြီ။

ဒါဆိုသူလေး ဆာပြီပေါ့ သမီးကို

ကုတင်ပေါ်မှာခဏထား နို့ဗှုးစီသွားလို့

နို့မှုန့်လောင်းထည့်ပြီးရင်

ရှိုတ်လုပ်ပြီး နွေးမနွေးစမ်း

သမီးစို့နိုင်တဲ့ အနေတော် အနွေးလေးမို့ သမီးစီပြန်လာ သမီးကိုချီ လည်ပင်းမှာသွားရည်ခံ

လေးတပ်ပြီး နို့စတိုက်တော့တာပေါ့။

ဆာနေတဲ့သမီးနို့စို့တာကိုကြည့်

ပီတိအဟုန်နဲ့ ကျွန်တော် မေးခွန်း

တဝက်ဖြေဆိုနိုင်ခဲ့ပြီမို့ကျေနပ်ပီတိ

ဖြစ်နေမိခဲ့တယ်။ဒီလို နဲ့ ပဲ

သုံးနာရီခြားတခါ နို့တိုက်ရင်း

သမီးလေးကို ပုခက်ထဲထည့်သိပ်ရင်

အစီအစဉ်မကျသောသီချင်းများ

ဟစ်ဆိုရင်းနဲ့ အချိန်တွေက ကုန်ဆုံး

ကျွန်တော်လည်း မေးခွန်းတော်တော်

များများဖြေဆိုလို့ပြီးခဲ့ပြီ။

ညနေစောင်းလေပြီ။ ညဉ့်ဌက်တို့အိမ်ပြန်ချိန်နဲ့အတူ သမီးလေး

လူးလွန့်ကာနိုးလာပြီ  ဖုန်းကလည်း

နောက်တကြိမ်  နို့တိုက်ဖို့ အသံမြည်လာတော့ သမီးကို ချီပိုး

ကုတင်ပေါ်ခဏတင်လို့ လုပ်နေကျအတိုင်း ဒိုက်ဗာလဲဖို့အဖွင့် ခဏတာ တိတ်ဆိတ်

ကျွန်တော်နဖူးမှာ ချွေးစေးများ ပြန်လာပြီ ကျွန်တော်မကျက်ခဲ့သော

ပုစ္ဆာ မလာနိုင်လောက်ဖူး ထင်ထား

သောမေးခွန်းတခု 

ဟားဟား သမီးလေး အီးအီးပါထားပြီ

တနေ့ကုန်စို့ထားသော နို့ များကြောင့် နို့ချဉ်နံ့ သင်းသင်း အီးအီးနဲ့

သမီးကို ကြည့်ရင်း

ကျွန်တော်ပျာယာခတ်လေပြီ။

ဟုတ်ပြီ အရံသင့်ရှိတဲ့သမီးပစ္စည်းတွေ

ထားတဲ့ခြင်းကိုယူပြီး  တစ်ရှုးအကြီးထုတ်ကိုဆွဲထုတ်ပြီး

သမီးကို ခြေထောက်လေးနှစ်ချောင်း

ကမပြီး ပါးစပ်ကနေ အင်းအင်းလို့အော်လိုက် တစ်ရှုးနဲ့ တချက်သပ်ချလိုက် အင်းအင်းလို့ အော်လိုက်

သပ်ချလိုက်နဲ့ ဒိုင်ဗာထဲ

အပြည့်ပဲ သိပ်မကြာလိုက် သမီးလေး

ငြိမ်ပြီး ရှုးရှုးပေါက်တော့သည်။

ဒါဆိုသေချာပြီ ကိုယ်မကျက်ထားပေမဲ့

ဖတ်မိတဲ့စာတကြောင်း ရှုးထွက်မှ အီးပြီးတာတဲ့ သမီးလေး အီးအီးပြီးလေပြီ။ ရေစိုတစ်ရှုးထုတ်

သမီးကို သန့်ရှင်းပေးပြီး ဒိုင်ဗာကို အလိုက်သင့်ခေါက်သိမ်းလိုက်တော့

ပူနွေးနွေး အထုပ်ကြီးတထုပ်ဖြစ်သွားတယ်။

ပြီးတာနဲ့ ဒိုင်ဗာကရင်ပြန်လိမ်းပေး

ဒိုင်ဗာပြန်ပတ်ပြီးတဲ့အချိန်မှာ

ခြေကားယားလက်ကားယားလေးနဲ့

နေသာထိုင်သာရှိသွားတဲ့ သမီးရဲ့

ဂူဂဲအသံနဲ့အတူ အဲယားကွန်းခန်းထဲ

ချွေးပြန်နေတဲ့ ကျွန်တော်တယောက်

ပီတိ တွေတပွေ့နဲ့ ငါအောင်မြင်ခဲ့ပြီ လို့

နူတ်မှတိုးတိုးရွတ်မိတော့တယ်။

ကဲနောက်ဆုံးပိတ် နို့တိုက်ရမဲ့ အချိန်ကိုစောင့်စားရင်း

သူ့အမေပြန်လာတာကို စောင့်မျှော်ရင်း သမီးနဲ့အတူ

စကားပြောလိုက်  ဆော့လိုက်နဲ့

ရယ်မောမြူးတူးနေသောသမီးပါးပြင်

လေးကို ခပ်ဖိဖိလေးနမ်းလိုက်တယ်။

alarm အသံနဲ့အတူ ကျွန်တော်ရဲ့

စာမေးပွဲပြီးဆုံးချိန်လည်းနီးကပ်လာ

တော့သည်။ သမီးအတွက် နို့ တဗူးဖျော်လို့ သမီးကို နို့တိုက်ရင်း

မနက်ကနေ ညနေအထိ သမီးနဲ့

အတူနေ သမီးရဲ့ကိစ္စလေးတွေကို လုပ်

ပေးတာတွေပြန်လည်တွေးရင်

ကျွန်တော်တချက်ပြုံးလိုက်မိတယ်

ထိုအချိန်မှာပဲ အဖြေလွှာစာရွက်သိမ်း

မဲ့ဆရာမရောက်ရှိလို့ လာခဲ့လေပြီ။

သမီးရဲ့ မေမေ အလုပ်ကပြန်လာလေပြီ။ သမီးလေးလည်း နို့ကုန်သွားပြီ

သမီးကို သူ့မေမေလက်ထဲထည့်ရင်း

ကိုယ်ဖြေဆိုခဲ့သော မေးခွန်းတွေအကြောင်း  ပီတီအပြုံးနဲ့ ပြောပြရင်း

သမီးမေမေရဲ့ ဆုအဖြစ်ပေးသော

အနမ်းဆုတပွင့်ကို လက်ခံရင်း

ကျွန်တော် သမီးရဲ့ ဖေဖေ ပီသခဲ့ပြီ

သို့မဟုတ် သမီးလေးနဲ့ တနေ့တာ

ပြီးဆုံးခဲ့လေပြီ။

လေးစားစွာဖြင့်

အမေ့သား

သွေးပန်းချီ

အတွေ့အထိလေးတခု
ကိုယ့်ပေါ်ရောက်လာ
ရုတ်တရက် လန့်နိုး
ကိုယ်ကြည့်လိုက်တော့
အိပ်မောကျနေတဲ့
ကိုယ့်ပန်းချီကားနှစ်ချပ်
ဆေးရေးကောက်ကြောင်း
အရောင်အဆင်း တူညီ
ပွင့်ဖူးဝေဆာနေသော
နူတ်ခမ်းပန်းလေး နှစ်ပွင့်။

တချိန်က တသသကြည့်
ရေးဆွဲချယ်မှုန်းခဲ့သော
နှလုံးသားပုံတူ ပန်းချီကား
ထိုနည်းတူစွာ ဖြစ်တည်ခဲ့တဲ့
ဒုတိယမြောက်ပန်းချီကား
ဒီပန်းချီကားနှစ်ချပ်ဟာ
အံ့သြစွာ တူညီလို့နေ
ကိုယ့်နှလုံးသားပုံတူဟာ
ပန်းချီကားသာ နှစ်ချပ်ဖြစ်ပေမဲ့
ခွဲခြားမရတဲ့ တခုတည်းသော
ကိုယ့်ရဲ့ အသွေးနဲ့ အသား။

ကိုယ့်ရဲ့
အသွေးနဲ့ရေးချယ်ခဲ့တဲ့
အသား ကင်းဘတ်ပေါ်က
သွေးပန်းချီကားလေးနှစ်ချပ်
အပြစ်ကင်းစွာ အိပ်မောကြနေတယ်။

အမေ့သား
၁၈/၁၁/၂၀၁၄

သမီးချော့တေး (၃)

ပိုးဥမေမေ

နေမကောင်းလို့ 

ဖေဖေ အလုပ်နား 

ပြုစုသည်။ 

 

မေ စားချင်တာ

ဖေ သွားဝယ်လို့ 

ပိုးဥလေးလည်း 

စားရမည်။ 

တအောင့်နေရင် 

ရေမိုးချိုးလို့ 

သနပ်ခါးလေး 

လိမ်းပေးမည်။ 

ညနေစောင်းရင် 

တိုက်အောက်ဆင်းလို့ 

ကျန်းမာဖို့အတွက် 

လမ်းလျှောက်မည်။ 

ကလေးလေးတွေ 

ကစားတာတွေ့တော့ 

ပိုးဥလေးလည်း 

ကစားချင်မည်။ 

ပိုးဥကြီးရင် 

ဖိုး နဲ့ဆော့လို့ 

ဖွားဖွားကလည်း 

ထိမ်းပေးမည်။ 

တီကျစ်လာရင် 

ပိုးဥလေးဖို့ 

အကျႍလှလှ 

ဝယ်လာမည်။ 

ပိုးဥမွေးရင် 

မိသားစု စုံလို့

ဖေ မေ ဖိုး ဖွား 

ပျော်ကြမယ်။ 

ပျော်ကြမယ်.......

ပျော်ကြမယ်....... 

အမေ့သား

၂၇-၅-၂၀၁၄

သမီးချော့တေး (၂)

ပိုးဥ မေမေ 

သနပ်ခါး

ပါးကွက်ကြားနဲ့

လှနေတယ်။

ပိုးဥကြီးရင်

ဒီလိုမျိုးလေး

ဖေဖေကိုယ်တိုင်

လိမ်းပေးမယ်။

နှာကြားလေးကို

ထင်ထင်ဆွဲလို့

ပါးကွက်ကြားလေး

ကွက်ပေးမယ်။

ဆံပင်လေးကို

စုကာစည်းလို့

နပန်းဆံလေး

ချည်ပေးမယ်။

လက်သည်းလေးမှာ

အလှဆင်လို့

ခြေသည်းနီလည်း

ဆိုးပေးမယ်။

ဖေဖေသွားရင်

နောက်ကလိုက်လို့

ကျောပိုးပြီးလည်း

ခေါ်သွားမယ်။

ဖေ့ချစ်ရင်သွေး

ပိုးဥလေးမို့

မေမေ မနာလို

ဖြစ်လိမ့်မယ်။

မေမေဆူရင်

ဖေ့စီပြေးလို့

ပိုးဥ အစား

အရိုက်ခံမယ်။

မေမေရိုက်ရင်

တို့တွေပြေးလို့

ဖွားဖွားကြီးနဲ့

သွားတိုင်မယ်။

ဖွားဖွားကြီးက

မေ့ကို ဆူတော့

တို့သားအဖ

ပျော်ကြတယ်။

မေမေငိုရင်

သမီးချော့လို့

ဖေဖေ့ကလည်း

ကူချော့မယ်။

ဖိုးဖိုး ဖွားဖွား

ပျော်ရွှင်စေဖို့

ပိုးဥလေးက

ကပြမယ်။

ကမယ်.......

ကမယ်.......

အမေ့သား

(၃-၅-၂၀၁၄)

နှောင်ကြိုး

ချည်တိုင်သိတဲ့ နွားလို 

အချိန်တန် အိမ်ပြန်ချင်မိပြီ။

ပြင်းထန်လွန်းတဲ့ ဆွဲငင်အားတခု

ညှိ့ယူခေါ်ဆောင်မှု့ကြောင့် 

အစေအပါးအနေနဲ့

ခစားလို့ဒူးထောက်

ကျွန်တော်တယောက်

အရှုံးပေးခဲ့လိုက်ပြီ။

စေလိုရာစေ 

နေစေရာနေလို့

ကျွန်တော်က

မင်းသမီးလေးရဲ့

ကြိုးဆွဲအရုပ်တရုပ်။

ငိုဆိုရင် ငို

ရယ်ဆိုရင် ရယ်လို့

လက်မြှောက် ခေါင်းငုံ

အမိန့်မဟုတ်သော

တယ်လီပသီစိတ်စေရာနဲ့

ကျွန်တော်တယောက်

ခိုင်းသမျှ လိုက်လုပ်ခဲ့ရပြီ။

ဒါကို မေတ္တာလို့ခေါ်ရင်

ကျွန်တော့်မေတ္တာတွေ 

ယို စိမ့်ထွက်လာပြီ။

အမေ့သား

၇-၄-၂၀၁၄

သို့/ ပိုးဥလေး

သို့/
ချစ်သမီးလေးပိုးဥ

ဖေ့ချစ်ရင်သွေး
ပိုးဥလေး

သမီးနားမှာနေ
တီတာခွန်းချို
ချစ်စကားလေး
ပြောချင်ပါတယ်။

သမီးနားမှာနေ
ထွေးပွေ့ယုယ
ကြင်နာမှုလေး
ပေးချင်ပါတယ်။

သမီးနားမှာနေ
သမီးတွန်းတိုက်ထိုး
မေမေ့ဗိုက်ကလေး
ကြည့်ချင်ပါတယ်။

သမီးနားမှာနေ
မေမေ့ဗိုက်ကလေး
ပွတ်သပ်ပေးရင်
ကြည်နူးချင်ပါတယ်။

သမီးရယ်
အခုတော့ ဝေး
သမီးအနားက ခဏလေး
ခွဲခွါလို့ ဖေ့ချစ်ရင်သွေး
တသက်တာအေးဖို့
ဖေဖေ ကြိုးစားလို့ရုန်း
ကုန်းရုန်းလုပ်လိုက်အုံးမယ်။

တချိန်မှာတော့
မိသားစုဆိုတာ
မိဘနဲ့သားသမီး
တစုတစည်းထဲ
အတူတူနေမှ
မိသားစုမည်သလို
ဖေဖေ့ရင်ခွင်ဟာ
မေမေနဲ့သမီးရဲ့
နားခိုရာတခုဖြစ်ရမှာပါ။

အခုတော့ သမီးရယ်။

အမေ့သား
5-4-2014

သမီးချော့တေး

ရွှေဗိုက်ရယ် တုန်

ခုန်နေတဲ့ ရင်သွေး

ဗိုက်ဘေးမှာ အသာမှေးလို့

တေးဆိုကာ ချော့ပါပေါ့

ပိုးဥရယ် အိပ်ပါတော့

ဖေ့ချစ် ရင်သွေး။

အမေ့သား

နွေဘဝ

နွေဘဝ



  

သရုပ်ပီအောင်

ရွက်ဝါကြွေ

မြက်တွေလည်းခြောက်

နေကျစ်ကျစ်တောက်မှာ 

လေပူတိုက်လို့

နွမ်းလျလေသမျှ

သြော် နွေဘဝက

ပင်ပန်းလှပါလား။

အမေ့သား

(၇-၃-၂၀၁၄)

ဘလော့ဂ်သင်္ကြန်



၂၀၁၄-ဘလော့ဂ်သင်္ကြန်အကြို 

ပျော်ရွှင်ပါစေ Blogs များသဘင်

တောင်းဆု မေတ္တာဝေ

မာစေ သာစေ လာကြလေ

ခွန်းနှုတ်ဆက်ဖို့လေ.....

ရေးပါလေ ပိုစ့်ပါလေ..... ရေး .....ရေး ......ရေးလိုက်ကြပါလေ။

ပိုစ့်ပါလေ ရေးပါလေ

ပိုစ့်......ပိုစ့်.......ပိုစ့်လိုက်ကြပေါ့လေ။

ဒီဘလော့ဂ် မှာရှိတဲ့အစ်မတွေ

ဒီဘလော့ဂ် မှာရှိတဲ့ ချစ်ဆွေ

ရေးကြလေ....... စာတွေ

ပေးမျှဝေ...... ကဗျာတွေ

ဒီလိုသာ ရေးရင်

ညစဉ် ညတိုင်းစောင့်ကာသာ

ဖတ်မလေ...........

အမေ့သား(အမှတ်တရဘလော့ဂ်များရဲ့သင်္ကြန်)

အိပ်မက်ဆိုးမှ လွတ်မြောက်ခြင်း

တိတ်ဆိတ်ခြင်းကို

ဖြိုခွဲ တကိုယ်တည်း

ဇောချွေးပြန်လို့

အိပ်ရာကလန့်နိုး

မိုးမလင်းသေးပါလား။

ငါ့ဘေးမှာ ငြိမ်သက်

အိပ်စက်နေတာ

ဘယ်သူလဲ.....

အသာအယာထွေးဖက်

အေးစက်လှတဲ့

ကိုယ့်လက်ကြောင့်

ချစ်သူနိုးမှာစိုးရွံ

တိုးတိုးလေးရေရွတ်

ဒါဟာအိပ်မက်မဟုတ်ဖူး။

ချစ်သူနဲ့အတူ မှေးစက်

မို့မို့ဖောင်းတဲ့ 

ဗိုက်ကလေးထဲ

အိပ်စက်နေတာ

ကျွန်တော့်ရင်သွေးဗျ။

တိတ်တိတ်လေးထိုင်ကြည့်

သာသာလေးငုံ့နမ်းလို့ ကြည်နူး 

မျက်ဝန်းက မျက်ရည်တစက်

ဖြတ်ခနဲ့အကျမှာ

ကျွန်တော်သိလိုက်ပြီ

ဒါဟာအိပ်မက်မဟုတ်ဖူး။

အိပ်မက်ဆိုးများထဲက

ကြိုးစားလို့နိုးထပေးတဲ့ ချစ်သူ

အပြစ်ကင်းစင်တဲ့ ချစ်သူကို

ဖွဖွလေးအနမ်းတပွင့်

ကျွန်တော်ခြွေခိုက်

ချစ်သူ့မျက်နှာအပြုံးတချက်

ကျွန်တော်မြင်လိုက်တယ်။

သေချာပါပြီ.........

ဒါဟာအိပ်မက်မဟုတ်ဖူး........

ကျွန်တော်အိပ်မက်ဆိုးတွေ

မမက်တော့ဖူး.......

လွတ်မြောက်သွားပြီ........

အမေ့သား

(၁၈-၂-၂၀၁၄)

အမေ့အိမ်

အမေ့အိမ်

အမေ ပျော်သောအိမ်

အမေ့ စိတ်တိုင်းကျ 

အမေ စီမံနိုင်သောအိမ်

အမေ့ ခြေ 

အမေ့ လက် 

အမေ့ သဘောကျ

အမေ လုပ်ပိုင်ခွင့်ရှိတဲ့အိမ်

ထိုသို့သောအိမ်ကို 

အမေ့သားချစ်သော 

အမေ့အိမ် လို့ခေါ်ပါသည်။

လေးစားစွာဖြင့်

အမေ့သား

(၁-၂-၂၀၁၄) 

HOME SWEET HOME ပြောင်းလဲခြင်း

HOME SWEET HOME ပြောင်းလဲခြင်း

Home Sweet Home ဆိုတာ

အနေကြာပြီး အဆင်ပြေတဲ့နေရာကို ခေါ်သလားလို့ မေးပါရစေ။

မွေးရပ်မြေကရော Home Sweet Home

မဖြစ်နိုင်ဖူးလားလို့ မေးစရာရှိလာခဲ့လိမ့်မယ်။

ဖြစ်နိုင်ပါတယ် .........ဖြစ်သင့်ပါတယ်

ဒါပေမဲ့ မဖြစ်နိုင်ဖူးလို့လည်းပြောလို့ရခဲ့ပါတယ်။

အမေ့သား စလုံးကိုရောက်ခါစအချိန်ကအရင်ရောက်နေတဲ့ မောင်ဦးများက ပြောကြတယ်။

မြန်မာပြည်ပြန်ရတာစိတ်ပျက်စရာ၊စိတ်ညစ်စရာကွာလို့ပြောတုံးက အမေ့သား

စိတ်ထဲ တော်တော်လေကြီးတဲ့လူတွေပဲမြန်မာပြည်မှာမွေး မြန်မာရေကိုသောက်ပြီး

လူဖြစ်လာတဲ့သူတွေက စလုံးလေးရောက်ပြီးမှ ဘာဖြစ်တယ် ညာဖြစ်တယ်ဆိုပြီး စိတ်ထဲကပြောမိတယ်။ အမေ့သားကိုယ်တိုင်လည်းမြန်မာပြည်အလည်ပြန်နေတာပဲ ဒီလိုပါပဲ.... သိပ်မထူးဆန်းပါဖူး။ 

ဒါဟာအစပိုင်းစလုံးနဲ့ သဟဇာတသိပ်မဖြစ်သေးတဲ့အချိန်အပိုင်း အခြားလေးမို့

ဆိုတာ ရောက်ပြီး ၅ နှစ်လောက်မှာ စတင်ခံစားလာရတယ်။ ဘာလဲဆိုတော့

မြန်မာပြည်ပြန်ရောက်ပြီး တပတ်ကျော်တာနဲ့ နေလို့ထိုင်လို့အဆင်မပြေတော့ဖူး။ တခုခုလို နေသလို ခံစားလာရတယ်။ 

ဘယ်လိုပြောမလဲဗျာ...

ဧည့်သည်တယောက်က သူများအိမ်မှာအကြာကြီး မနေချင်တဲ့စိတ်မျိုးဖြစ်လာတယ်။ တဖြေးဖြေးနဲ့ စလုံးကို ကိုယ့်အိမ်ကိုယ့်ရာလို့မှတ်ထင်လာမိတယ်။

အရင်လို မြန်မာပြည်ပြန်ရောက်လို့သူငယ်ချင်းတွေနဲ့ ဟေးလားဝါးလားမလုပ်ချင်

တော့ဖူး။သူတို့ကိုယ်တိုင်လည်း မအားလပ်တော့ဖူး ။ရက်ကြာလာတာနဲ့အမျှ အထီးကျန် ဆန်သလို ခံစားလာရတယ်။ နောက်ပိုင်းတော့မြန်မာပြည်ပြန်ဖြစ်တဲ့အခါ

မွေးရပ်မြေမှာ မနေပဲ ရောက်တာနဲ့ ခရီးစထွက်၊ဘုရားစုံလိုက်ဖူး၊

ခရီးတခုကပြန်လာ၊ နောက်တခုကူး နဲ့ ရက်လည်းပြည့် စလုံးလည်းပြန်တဲ့အစီအစဉ်

ကိုပျော်မွေ့လာတယ်။

ပထမပိုင်းတော့တလခွဲလောက်ပြန်၊တဖြေးဖြေးနဲ့ တလ၊နောက်တော့တပတ်ဖြစ်လာပြီး 

ကိုယ်ပျော်ရာနေရာလေးကကိုယ့်ရဲ့HomeSweetHomeဖြစ်မှန်းမသိဖြစ်လာခဲ့တယ်။

မြန်မာပြည် အခါမှာတခြားတိုင်းတပါးကို သွားလည်ရသလိုဖြစ်လာပြီး စားတာ၊နေတာ သွားတာ၊လာတာကစလို့သိပ်အံမဝင် ဂွင်မကျဖြစ်လာတော့ ပြန်စဉ်းစားမိတယ်၊ ငါဘဝင်မြင့်လာတာလား၊ စိတ်ကြီးဝင်လာတာလား။ မနေဖူး.......မထိုင်ဖူး

မကိုင်ဖူး..... မသုံးဖူးတာတွေသုံးပြီး အောက်ခြေလွတ်နေတာလားလို့ပြန်တွေးမိတာ အခါခါ။ မဟုတ်ရပါဖူးဗျာ။ စလုံးရောက်လာတဲ့သူတိုင်းနေထိုင်သုံးစွဲသလိုပဲ နေထိုင်စားသောက်တာပါပဲ ၊

ဒါပေမဲ့ ပတ်ဝန်းကျင် လူနေမှု အသွင်သဏ္ဍာန်ပြောင်းလဲမှုကြောင့် အမေ့သားတို့ရဲ့

စိတ်ပိုင်းဆိုင်ရာ ရုပ်ပိုင်းဆိုင်ရာတွေက အနေကြာတဲ့နေရာ ကိုယ်နဲ့ Use Too ဖြစ်နေ

တဲ့ နေရာကိုသာတပ်မက်လွမ်းဆွတ်ကြတာမို့တပြည်ခြားကကိုယ့်ရဲ့ ိမ်လိုဖြစ်လာခဲ့ရင်းHome Sweet Home ဆိုတာ ခေါင်းစဉ်မှန်ပြီး အတွင်းစာသားတွေမှားနေတဲ့ စာတပုဒ်လိုဖြစ်နေခဲ့ရပြီ။

ဒါကို တနေ့က အဖိုးဆုံးလို့ မပြန်မဖြစ်ပြန်သွားရတဲ့ အမေ့က သက်သေပြ ခဲ့တာပဲ ။

အမေစလုံးရောက်တာ (၆)နှစ်မှာ ဒီတခါပြန်တာ ဒုတိယအကြိမ်ပါ၊ ပထမတကြိမ်က

ရောက်ပြီးသိပ်မကြာခင်ညီမလေးမင်္ဂလာဆောင်လို့ပြန်ရတာမို့ပါ။အခုတခေါက်ရယ်

ကြားမှာ(၅)နှစ်ကျော်မွေးရပ်မြေနဲ့ ဝေးခဲ့တဲ့အမေ မနေတတ်မထိုင်တတ်တွေဖြစ်ပြီး

မြင်မြင်ရာစိတ်ရှုပ်နေတာပဲတဲ၊့ ဒီမှာက သူ့လက် သူ့ခြေ သူ့စိတ်ကြိုက်နေချင်သလိုနေ 

စားချင်သလိုစား သွားချင်ရာသွား နေလာတဲ့သူတယောက်အတွက် ညီမလေးအိမ်က သူအတွက် မွန်းကြပ်နေတယ်တဲ့၊ သူ့အိမ်ကိုပဲ သူပြန်ချင်နေတယ်တဲ့ ညီမလေးက

ဒါအမေ အရင်နေခဲ့တဲ့အိမ်ပဲလေဆိုတော့ ငါ့အိမ်က စလုံးမှာတဲ့။ဟုတ်ပါလိမ့်မယ်

အမေမြန်မာပြည်ပြန်ရောက်ရောက်ချင်း ချောင်းတွေဆိုးပြီးဖျားပါတော့တယ်၊

အညှော်နံတွေမခံနိုင်လို့ခေါင်းတွေမှုးပြီး မျက်နှာကြီး စိတ်ပျက်လက်ပျက်ဖြစ်နေတဲ့ပုံ

ကိုညီမလေးကပို့လာခဲ့တယ်။ကိုယ်တွေမှာစိုးရိမ်ပြီး ဆေးခန်းသွားဖို့ပြောရတာအမောပါ။ပြန်လာခါနီးအထိ နေမကောင်းသေးတဲ့အမေတယောက်မနက်ဖြန်လည်း ပြန်ရမယ်ဆိုတော့ အတော်လေး လန်းဆန်းသွားတယ်တဲ့၊

လေယာဉ်ချိန် ၁၁ခွဲမှာ အမေက မနက်၆ နာရီလောက်ကတည်းက ပြင်ဆင်ပြီး အိမ်ရှေ့

မှာအထုပ်တွေအပိုးတွေအဆင်သင့်ဖြစ်နေခဲ့ တော့ ဆွေမျိုးညီအစ်ကိုမောင်နှမတွေက

တအံ့တသြတွေဖြစ်ပြီး ပြန်ရမှာပါ မပူပါနဲ့လို့တောင်ပြောရတဲ့အထိ အမေတယောက် စလုံးကိုခင်တွယ်မိနေတယ်။

ပြန်ရောက်မဲ့နေ့ အမေ့သားတို့သွားကြိုတော့တက်ကြွလန်းဆန်းတဲ့အမေ့သွင်ပြင်ကို မြင်ရတော့ဝမ်းသာမိတယ် ။မြန်မာပြည်ကလူတွေပြောတဲ့ အမေနေမကောင်းဖူးဆိုတာဘာကိုပြော

တာလဲလို့ပြန်မေးရမဲ့ အခြေအနေဖြစ်နေတယ်၊ ဒါပေမဲ့ ကျွန်တော်သိလိုက်ပါပြီ တကယ်တော့ အမေနေမကောင်းတာမဟုတ်ဖူး၊ စိတ်မကောင်းတာ၊စိတ်မပျော်တာ

အမေအနေကြာပြီးအမေနဲ့သဟဇာတဖြစ်တဲ့ နေရာကနေခွဲခွာပြီးအမေ့မွေးရပ်ကိုပြန်

ရပေမဲ့ ပျော်ဖူး။ မေ့မွေးရပ်မှာအမေကသူစိမ်းတယောက်ဖြစ်နေတော့အမေ့စိတ်ခံစားချက်ကအမေ့ရဲ့ Home Sweet Home ဆိုတာ အမေ လက်ရှိနေနေတဲ့ အမေ့သားရဲ့

အမေ့အိမ်လေးဆိုတာကို အမေက စိတ်ပိုင်းဆိုင်ရာ ရုပ်ပိုင်းဆိုင်ရာနဲ့ ထင်သာမြင်

သာလစ်ဟပြလိုက်တော့ ကျွန်တော်တို့ခံစားရတဲ့ ခံစားမှုတခုဖြစ်တဲ့ ချန်ဂီလေဆိပ်ကို လေယာဉ်ဆင်းတာနဲ့ Home Sweet Home လို့

စိတ်ထဲကတိုးတိုးလေးရွတ်မိတာ မလွန်ပါဖူးလို့တွေးမိရင်း ။

အမေ့သား

(၂၈-၁-၂၀၁၄)