Sunday, May 16, 2021

တရားသောစစ်


မမြင်ရပေမဲ့

ကြားနေရတဲ့သတင်း

ငါ့ရင်ထဲမှာ ပူလောင်ဆဲ

တိုင်းပြည်အတွက်

အသက်စွန့်တိုက်နေတာ

စစ်သားတွေမဟုတ်မှန်း

သိလာကြတဲ့နောက်

တိုင်းပြည်ကို

ဖျက်စီးနေကြတာ

စစ်သားတွေမှန်း

သိလာကြတဲ့နောက်မှာ

လက်သုံးချောင်းထောင်လို့

ငါတို့တိုက်ပွဲအတွက်

ငါတို့မျိုးဆက်တွေရှေ့ထွက်

မြန်မာပြည်ကြီး

သာယာရေးအတွက်

တိုက်ပွဲဝင်ကြရင်း

ပေးဆပ်နေကြရတာ

မနည်းတော့ဘူး

တရားသောစစ်အောင်ပါစေ

မတရားသောသူများကျဆုံးပါစေလို့။

အမေ့သား

၁၆.၀၅.၂၀၂၁



Wednesday, September 18, 2019

မီးခိုးတွေနဲ့ မြို့

သူ့မြို့ကလေးက
သန့်ရှင်းသပ်ရပ်
စည်းကမ်းအထပ်ထပ်နဲ့ပေါ့

အမှိုက်ပစ်တော့
ဒဏ်ငွေရိုက်တယ်
စီးကရက်ခွံလေးဟာ
ဒေါ်လာ၃၀၀ တန်တယ်

မီးနီဖြတ်မိတော့
၁၂ မှတ်နဲ့ ဒေါ်လာ၂၅၀
ဘေးအိမ်ကဆူညံ
ရဲကိုဖုန်းဆက်တော့
၅ မိနစ်နဲ့အိမ်ရှေ့ရောက်တယ်

ည၁၂ နာရီထိ
အမှောင်မဖုံးပဲလင်းလက်
တယောက်တည်းပြန်လည်း
လုံခြုံစိတ်ချရတဲ့ မြို့

အခုတော့ မီးခိုးတွေနဲ့ပြည့်
သူ ဒဏ်ရိုက်မရဘူး
သူ ဖမ်းမရသလို
ကိုယ်တွေအဖြစ်ကလည်း
ရဲကိုဖုန်းဆက်မရဘူး

သူ့မြို့လေးရဲ့ ကျန်းမာရေးကို
မီးခိုးတွေက နှိပ်စက်နေပြီ
ဒီမီးခိုးတွေက သူ့စီက မလာ
သူလုပ်တာမဟုတ်ဘူး

သူကပဲအမြဲ လူတိုင်းကို
အပြစ်ဒဏ်ပေးပေမဲ့
တနှစ်တခါတော့
သူလည်းအပြစ်ဒဏ်ခံလို့
သူ့ရဲ့ မြို့ငယ်လေး
မီးခိုးတွေဖုံးနေတယ်။

အမေ့သား

Tuesday, September 10, 2019

ခေါင်းစဉ်မဲ့တဲ့ ၅ နာရီ

တနေ့မှာ ၂၄နာရီ
ငါ့အိပ်ချိန်က ၆ နာရီ
အလုပ်ထဲမှာ ၁၃နာရီ
အဖြေရှာမရတာ ၅ နာရီ
လမ်းသွားရင်း ကုန်
ဖေ့ဘွတ်သုံးရင်း ကုန်
သောက်စားရင်း ကုန်
ကုန်ဆုံးသွားတဲ့ ၅ နာရီထဲ
တနာရီလောက် ခေါင်းစဉ်ရှာ
တခုခုတော့ ယူဆောင်
လူဖြစ်မရှုံးအောင်ပေါ့။

အမေ့သား
၁၀-၀၉-၂၀၁၉

Tuesday, September 03, 2019

တန်ဖိုးနည်း ဥပဒေ


လွယ်လင့်တကူရတဲ့
ဆေးပြားတွေလိုပေါ့
လိုချင်တဲ့အချိန်ဖြစ်တယ်
စျေးမှမကြီးတာကို
စေ့စေ့အကြည့်မခံ
သေးသေးအတင်မခံ
ဟန်တချက် မာန်တချက်
ခံပက်မိတာနဲ့ စွဲတဲ့
ပုဒ်မ ၆၆(ဃ)ဟာ
တန်ဖိုးနည်း ဥပဒေ။

အမေ့သား

Saturday, August 31, 2019

အလွမ်း

အကြောင်းသင့်လို့
လွမ်းမိတဲ့အခါ
ငါ့ကို ထည့်လွမ်းပေးပါ

အမှတ်တမဲ့
ပြန်တွေ့တဲ့အခါ
ငါ့ကို လှမ်းခေါ်ပါ

မဆုံနိုင်တော့တဲ့
ခဏတာမှာ ငါ့က
တခြားရင်ခွင်ထဲမှာ

တနေ့နေ့တော့
ပြန်ဆုံချင်တယ်
ရှိခဲ့ဖူးကြတဲ့
သံယောဇဥ်တွေနဲ့

ငါ့ကိုပြန်ခေါ်ပါ
ငါလည်း ပြန်ခေါ်မှာပါ
မင်းတို့နဲ့ ငါ ကံမကုန်ရင်ပေါ့

အမေ့သား