Wednesday, March 25, 2015

ကျွန်တော်ကို ပျော်ရွှင်ခွင့်ပေးပါတော့

ကျွန်တော်မူးနောက်နောက်ဖြစ်လို့
ဆေးခန်းကိုသွား သွေးပေါင်ချိန်တော့ 
၁၅၀/ ၁၀၂
ဆရာဝန်က ပြောပါလေရော 
အငန်စာတွေလျော့
အဆီအစိမ့်လျော့ 
အရက် ဘီယာလျော့ 
စိတ်ဖိစီးမှုလျော့
ပြီးတော့ တလစာဆေးပေးလို့
နေ့စဉ်သွေးပေါင်ချိန်ကြည့်ပြီး 
မော်နီတာလုပ် မိန်းတိန်းလုပ်ဖို့ပြောလေသည်။
ဘာကြောင့် သွေးတက်ရပါသနည်း
အဆီအစိမ့် လား
အရက် ဘီယာလား
အငန်စာတွေကြောင့်လား
သေချာတာက ကျွန်တော် အရက်သမားမဟုတ်
အမေချက်သမျှ ဟင်းလျှာ ငန်စရာမရှိ
ဝက်သားကြိုက်ပေမဲ့ ဝက်အဆီမစားတဲ့အတွက် 
ဒီလောက်ထိဖြစ်စရာမလိုပေ။ဒါဆိုကျန်နေတာ
စိတ်ဖိစီးမှု သူသည်တရားခံလား။
စိတ်ညစ်စရာ 
စိတ်ဖိစီးမှုဖြစ်စရာ ဘယ်မှာလဲ 
အလုပ်ထဲမှာလား မဖြစ်နိုင်
လုပ်သက်များနေတဲ့ ကျွန်တော်အတွက် 
ဖိစီးမှု မရှိသလို အလုပ်နဲ့ ပတ်သက်လို့
ဒီနေ့လုပ်သမျှ ဂိတ်ဝမှာထားပြီး ပြန်ခဲ့တာ
နှစ်ချီကြာခဲ့လေပြီ။
ဒါဆို အိမ်မှာပေါ့ 
မိသားစု ပြဿနာ 
ငွေကြေးပြဿနာ
မိသားစုစည်းစည်းလုံးလုံးနေလာခဲ့တဲ့အတွက် 
မိသားစုပြဿနာဆိုတာ မဖြစ်နိုင်
ငွေကြေးပြဿနာ သွေးတက်လောက်အောင် 
မဖြစ်နိုင်သော စိတ်ဖိစီးမှု သုညဘဝကစလာလို့
ငွေကြေးဆိုတာ မရှိအေးဆေး ရှိအေးဆေး
ဘာကြောင့်လဲ ဘာအတွက်လဲ
ဘယ်သူမှ မသိပေမဲ့ ကျွန်တော်တယောက်တည်း သိခဲ့တဲ့ အသိ
ထုတ်ဖော်မပြောခဲ့ပေမဲ့ ပြန်လည်သုံးသပ်တော့ 
အဖြေက သေချာခဲ့လေပြီ။
အဓိက အကြောင်းအရာသည် 
ကျွန်တော့် ဘဝ
ကျွန်တော့် အသက်
သူနဲ့ ပတ်သက်လာရင် ချစ်လှပါချည်ရဲ့ဆိုတဲ့ 
ဇနီးသည်ကိုတောင် အမြင်ဝေဝါးအောင် 
လုပ်နိုင်တဲ့ သူ 
သူကလေးက ချစ်သမီးလေး ရွှေပိုး
သူလေး ဆိုးလို့သူလေးရောဂါဘယ
ထူပြောလို့မဟုတ်ဘူး။ သူ့ကြောင့် အခုချိန်ထိ
မိဘဖိုးဖွား စိတ်မဆင်းရဲခဲ့ရပေ။
ဒီလောက်လိမ္မာတဲ့ကလေး ဘာအတွက် သူကြောင့် ဟု ပြောရတာလား
ဘယ်လိုဖြစ်လို့ရွှေပိုးကြောင့် စိတ်ဖိစီးမှု
ဖြစ်ကာ သွေးတက်ရပါသနည်း။
သမီးလေးကို 
ဘယ်လိုရရှိခဲ့တယ် 
ဘယ်လိုပြုစုခဲ့ရတာ 
ဘယ်လိုတန်ဖိုးထားရတယ်ဆိုတာ
ပြောစရာနှိုင်းယှဉ်ပြစရာလိုမည်မထင်။
ဖြစ်ပျက်ခဲ့ထားတဲ့ အကြောင်းအရင်းတွေ
ခံစားခဲ့ရတဲ့ နှလုံးသားကွဲကြေခဲ့မှုတွေကြောင့်
ကျွန်တော့်ရင်ထဲမှာ အမြဲတမ်း စိုးရမ်ပူပန်မှုတွေ
ကိန်းအောင်းနေခဲ့ရတယ်ဆိုတာ ဇနီးသည်လည်း သိသင့်သလောက်သိပေမဲ့
မတားဆီးနိုင်သလို ကျွန်တော်ကိုယ်တိုင်လည်း
ဖြေလျော့လို့မရခဲ့ခြင်းပေ။
ကျွန်တော်သိခဲ့ပါသည်။ ကျွန်တော်ရဲ့စိတ်ဖိစီးမှု
ပိုမိုဆိုးရွားစေခဲ့တာက မြန်မာပြည်ကို အလည်ပြန်ခဲ့ချိန်မှာ စတင်ခဲ့လေခြင်း
အပျော်သဘော ဆွေမျိုးတွေကို သမီးလေးနဲ့ 
တွေ့ခွင့် ပေးစေခဲ့လို့တဲ့ ကျွန်တော်ရဲ့ဆန္ဒကို
ယူကြုံးမရခြင်း အလိုလို ဒေါသထွက်လာစေခြင်း
ကျွန်တော့်ကို ကျွန်တော် တခုခုလုပ်မိချင်တဲ့စိတ်
ဖြစ်စေခဲ့တာက သမီးလေးမြန်မာပြည်မှာ
ဖျားနာပြီး နေမကောင်းဖြစ်လိုက်ခြင်းပေ။
မြန်မာပြည်က ပြန်လာပြီးနောက်ပိုင်း 
ကျွန်တော့်စိတ်တွေ တောင်စဉ်ရေမရဖြစ်လာ
ညဖက်တွေမှာ အိပ်မပျော် သမီးလေးတခုခုဆိုတာနဲ့ ပူပန်စိတ်တွေများပြီး
ဆေးရုံ ဆေးခန်းပြေးဖို့သာကြံစည်နေ
သမီးအတွက်အရေးမကြီးသလို ပြောလာသမျှ
အဲ့ဒီလူကို စိတ်ထဲကနေ ဒေါသတွေဖြစ်ပြီ။
တရေးနိုး သမီးလေးကို ထကြည့်ရ ထစမ်းရတာတွေကို ချစ်ဇနီးသိတဲ့အခါသိသလို
သူမ မနိုးတဲ့အခါတွေလည်း ရှိခဲ့တာ ဇနီးသည်
သိချင်မှ သိပေလိမ့်မည်။
ကျွန်တော် ပြန်တွေးမိသလောက် မြန်မာပြည်ကပြန်လာပြီးနောက်ပိုင်းမှာ
ဒေါသတွေပိုကြီးတတ်လာတယ်။သမီးနဲ့
ပတ်သက်ရင် သေးသေးတင် သိပ်မခံချင်တော့
ဘာကိုပူပန်လို့ ဘာကိုစိုးရိမ်မှန်းမသိ
ဘာကိုတွေးပူလို့ ဘာကြောင့်ဆိုတာ
အဖြေမရှာချင်တော့ပေ။ကျွန်တော်သိတာတခုပဲ
သမီးကို ကျွန်တော်ချစ်တယ် 
သမီးကို ကျွန်တော် အသက်လောက်ချစ်တယ်
ဒါကို ကျွန်တော်ပဲ သိလိမ့်မည်။ကျွန်တော်ပူပန်မှု
စိုးရိမ်ကြောင့်ကြမှုတွေ ကင်းဝေးချင်ပြီ
ကျွန်တော်မသိစိတ်မှာစိုးမိုးနေတဲ့ စိတ်ဖိစီးမှုကို 
အမြန်ဖယ်ရှားချင်တယ်။ ကျွန်တော့်ရင်ထဲကို
ဝင်ကြည့်ပေးကြပါ။ ကျွန်တော်ကို နားလည်ပေး
ကြပါ။
ကျွန်တော် မိသားစုဆိုတာလေးကို ပြည့်ဝစွာ
ခံစားခွင့်ရနေပြီမို့ ကျွန်တော်ကို ပျော်ရွှင်ခွင့်
ပေးပါတော့ဗျာ။
အမေ့သား