မမြင်ရပေမဲ့
ကြားနေရတဲ့သတင်း
ငါ့ရင်ထဲမှာ ပူလောင်ဆဲ
တိုင်းပြည်အတွက်
အသက်စွန့်တိုက်နေတာ
စစ်သားတွေမဟုတ်မှန်း
သိလာကြတဲ့နောက်
တိုင်းပြည်ကို
ဖျက်စီးနေကြတာ
စစ်သားတွေမှန်း
သိလာကြတဲ့နောက်မှာ
လက်သုံးချောင်းထောင်လို့
ငါတို့တိုက်ပွဲအတွက်
ငါတို့မျိုးဆက်တွေရှေ့ထွက်
မြန်မာပြည်ကြီး
သာယာရေးအတွက်
တိုက်ပွဲဝင်ကြရင်း
ပေးဆပ်နေကြရတာ
မနည်းတော့ဘူး
တရားသောစစ်အောင်ပါစေ
မတရားသောသူများကျဆုံးပါစေလို့။
အမေ့သား
၁၆.၀၅.၂၀၂၁
သူ့မြို့ကလေးက
သန့်ရှင်းသပ်ရပ်
စည်းကမ်းအထပ်ထပ်နဲ့ပေါ့
အမှိုက်ပစ်တော့
ဒဏ်ငွေရိုက်တယ်
စီးကရက်ခွံလေးဟာ
ဒေါ်လာ၃၀၀ တန်တယ်
မီးနီဖြတ်မိတော့
၁၂ မှတ်နဲ့ ဒေါ်လာ၂၅၀
ဘေးအိမ်ကဆူညံ
ရဲကိုဖုန်းဆက်တော့
၅ မိနစ်နဲ့အိမ်ရှေ့ရောက်တယ်
ည၁၂ နာရီထိ
အမှောင်မဖုံးပဲလင်းလက်
တယောက်တည်းပြန်လည်း
လုံခြုံစိတ်ချရတဲ့ မြို့
အခုတော့ မီးခိုးတွေနဲ့ပြည့်
သူ ဒဏ်ရိုက်မရဘူး
သူ ဖမ်းမရသလို
ကိုယ်တွေအဖြစ်ကလည်း
ရဲကိုဖုန်းဆက်မရဘူး
သူ့မြို့လေးရဲ့ ကျန်းမာရေးကို
မီးခိုးတွေက နှိပ်စက်နေပြီ
ဒီမီးခိုးတွေက သူ့စီက မလာ
သူလုပ်တာမဟုတ်ဘူး
သူကပဲအမြဲ လူတိုင်းကို
အပြစ်ဒဏ်ပေးပေမဲ့
တနှစ်တခါတော့
သူလည်းအပြစ်ဒဏ်ခံလို့
သူ့ရဲ့ မြို့ငယ်လေး
မီးခိုးတွေဖုံးနေတယ်။
အမေ့သား
တနေ့မှာ ၂၄နာရီ
ငါ့အိပ်ချိန်က ၆ နာရီ
အလုပ်ထဲမှာ ၁၃နာရီ
အဖြေရှာမရတာ ၅ နာရီ
လမ်းသွားရင်း ကုန်
ဖေ့ဘွတ်သုံးရင်း ကုန်
သောက်စားရင်း ကုန်
ကုန်ဆုံးသွားတဲ့ ၅ နာရီထဲ
တနာရီလောက် ခေါင်းစဉ်ရှာ
တခုခုတော့ ယူဆောင်
လူဖြစ်မရှုံးအောင်ပေါ့။
အမေ့သား
၁၀-၀၉-၂၀၁၉
အကြောင်းသင့်လို့
လွမ်းမိတဲ့အခါ
ငါ့ကို ထည့်လွမ်းပေးပါ
အမှတ်တမဲ့
ပြန်တွေ့တဲ့အခါ
ငါ့ကို လှမ်းခေါ်ပါ
မဆုံနိုင်တော့တဲ့
ခဏတာမှာ ငါ့က
တခြားရင်ခွင်ထဲမှာ
တနေ့နေ့တော့
ပြန်ဆုံချင်တယ်
ရှိခဲ့ဖူးကြတဲ့
သံယောဇဥ်တွေနဲ့
ငါ့ကိုပြန်ခေါ်ပါ
ငါလည်း ပြန်ခေါ်မှာပါ
မင်းတို့နဲ့ ငါ ကံမကုန်ရင်ပေါ့
အမေ့သား
